Alla Itolae Nusa 34
Kena rebai sae me Lea kai Yakupe luasi nanae Dina ikeu hole loko binaya me kota mere.
Eleki kena Hamore tamata Hewi kamale kota mere eni nana Sikeme iselu Dina, eleki inaya le Dina kai intulu kaini.
Po lalei titinai loko Dina, hoko iumauke Dina leke lale lokoi.
Sikheme ibeteke loko amai be, “Ama, aatula kena supu kwete bina mere noma leke au kai kaini.”
Yakupe ilene be Sikheme iklemake eni nanare, po iono sasaisa mo le eni nanaru esi keu ala binatane hoko inamake eti esi leu.
Eleki Sikeme amai Hemore iluake loko Yakupe kena ilepa kaini.
Kena mere Yakupe eni nanaru esi leu bei keu ala binatanaru. Eleki kena esi lene mere hoko lalesie tia titinai le Sikheme iklemake esi beta binare hoko mere isobue pusue tamata Israelaru.
Hemore ibeteke loko Yakupe be, “Auku anare lalei loko amu anare, sepo asuka hoko arilukeni ete auku anare kena ikai kaini noma.
Ite lalema esa kena kai leuke lomai.
Kai sebeie imi rue kena tapele meije neka kena otoi rebe imi suka rue kenare. Kai sebei imi abeli kai imi supu tanei sasaisa neka.”
Eleki Sikheme ibeteke loko Dina amai kai betaisi be, “Saisa rebe au kotiele meije imi suka hoko imi kotie sasaisa neka, au rilukele ete imi.
Imi beteke saisa rebe imi sukare kai eni beline elika. Au riluke saisa rebe imi kotiele mabe au kai kai bina mere.”
Eleki Yakupe eni nanaru esi lemake Sikheme kai amai luasi le Sikheme iklemake esi beta binare,
hoko esi beteke be, “Tamata mokwai rebe isunate more, ami riluke amiki beta binare etei mo le mere easomie ami.
Ami riluke amiki beta binare etemu, po suke imi ono lulu meije. Imi pusumi suke imi lulu ami, hoko pusue tamata mokwaije suke sunate.
Eleki namake pine ami riluke amiki kwete binaru ete imi kai ami rana imi kwete binaru, kai ami rue kai imi leke ite ono bangsa esa.
Po sepo imi lene loko ami mo pine imi sunate mo hoko ami rana suike amiki beta binara eleki ami keu.”
Hemore kai eni nanae Sikheme luasi lulue.
Sikheme iono lulu esi beteke mere sosoli neka le lalei loko Dina kuate. Kai pusue eni tamataru esi holmatei.
Eleki Hemore kai eni nanae Sikheme luasi keu me otoi maka tetue lomai me kotare esi metu uluije kai luasi beteke loko tamata kota mere be,
“Tamata Israela meru iteki sopate hoko sebei esi rue mei otoi meije kai sebei esi abeli kai esi supu tanei sasaisa neka. Le masike esi rue kai ite lekwe po tapele meije penu mosa. Kai ite kai esi kwete binaru kai esi kai iteki kwete binaru.
Tamata meru esi suka rue kai ite kai ite ono bangsa esa, po esi kotie bei ite be suke pusue tamata mokwai, sunate lulusi.
Kai tatike pine esi binatanaru kai esi taneiaru uleue ite. Hoko ite lulu esi beteke leke esi rue kai ite.”
Eleki pusue tamata kota mere rebe esi lupuke lomai me kotare esi metu uluije, esi lene loko Hemore kai eni nanae Sikheme luasi beteke, eleki sunante pusue mokawai elaka me kota mere.
Eleki ele petu telure, kena esi blake kera kuate, Yakupe eni nanae lua Simone kai Lewi, Dina betaisi, esi kusu kotare sae rekwasi mo. Esi luake le sari eleki esi bunu pusue tamata mokwai ete mere.
Kai luasi bunu kai Hemore kai eni nanae Sikheme eleki luasi rana Dina bei Sikheme eni lumare eleki esi keu.
Eleki Yakupe eni nana maketaru esi rana pusue kota mere esi taneiaru le laleisu tia le Sikheme iklemake esi beta binare pe.
Hoko esi rana pipi, domba, sape, keledai kai pusue taneia rebe ume kota pise me kota mulini.
Esi rana pusue tanei rebe esi belini elake, esi kerike kwetele kai bina kai esi rana pusue taneia rebe me luma lalei.
Eleki Yakupe ibeteke loko Simone kai Lewi be, “Imi ono susate ete au. Kena meije tamata Kanane kai tamata Perise kai pusue tamata mei kota meije esi laleisu tiake au. Iteki tamataru esi boka mo, sepo tamata meru esi lupuke lomai kena esi lisa kai ite hoko ite ktili mo kai iteki lumatoini mata pusue.”
Po esi ombe, “Ami suka klemake amiki beta binare lupe bina lalane mo.”